Stöffle    &    Hölzle    ®

Stöffle ond Hölzle - Wer senn die zwoi?

Kurz an ganz kloina Steckbrief von ons, damit ihr au wissed, wer mir eigentlich senn.

Als erstes isch do mol d´Frau Stöffle, weiblich und zuckersüß. Sui hot selligsmol vor viele Johr Schneiderin glernt. Ond weil se des Handwerk wie a Moischderin beherrscht, macht se so älles Megliche aus Stoff. Dascha ond Röck, ond andere Sacha au. Ond wenner se ganz lieb froged, machts se eich au Extrawünsche. Do isch se recht fläxibel.

Ond no gibt´s dr Herr Hölzle, männlich und stabil (quasi en Tschortsch Kluni Tüp) der hot au vor viele Johr mol ebbes gscheids glernt. Näämlich Schreiner. Au do isch no so einiges henga blieba. Des zoigt er jetzt in hochwertigem Holz-Schmugg, dass er no was ko. Au andere Sächla macht er für eich, wenn´s obedingt sei muas.

Zamma schaffed Frau Stöffle ond dr Herr Hölzle wie´d Bronnabutzer, damit se eich tolle Ergebnisse zoiga kennad. So senn halt mir Schwoba. Schaffig ond ehrgeizig. Ond vor allem brauched die Badenzer ja au Helden, zo denne se naufgugga kennad.

Uffgwaxa semmer boide en Gebbinga, ond leicht dromrom. Also echte Sauschwoba halt. Großgworda semmer durch gute Erziehung der Eltern, ond mit Mauldascha, saure Kuttla, ond vor allem mit Spätzle ond gaanz viel Soß.

Uff derra Seite zoiga mr mol grob, was mir so mached. Jetzt gugged ihr eich des halt mol o. Ond wenner Froga henn, no nemmad halt uier Händi, ond rufed ons o, oder schreibet a WotsÄpp, (ihr henns doch eh dr ganze Dag en de Griffl, ihr Lombaseggl)

Onser Portfolio – Also des was mir so henn

Mir mached älle onsere Sächla selber. Bei ons greagsch deutsche Qualitätsarbeit, ond koin Kiina-Gruschd. Wer a Glomb kaufa will, isch bei ons falsch.

Wenner auf die Seite „Unser Portfolio“ drugged, no sehad ihr a Mugga-Seggale von dem, was mir so älles mached. Älles sieht mr do no lang ed. Zom Doil senn do no Aspach-Uraltbilder von Sacha dren, die scho lang verkauft senn. Aber mir konzentriered ons mit onserer Zeit halt, uff´d Produktion von onsere Sächla. Wenn mr ständig nuie Bilder macha missdet, no wär nix anders gschafft. Am beschda glotzed ihr mol uffém Markt, oder en onserm Lädle vorbei. Weil do isch des, was no ed verkauft isch.

Ko mr bei ons au onlein eikaufa?

Bevor bleed frogsch – NOI

So a Hondsglomb brauched mir ed. Mir schwätzed no mit de Leit. Ond des mached mir gern. Aus dem Grond gibt´s onsere Sacha nur em Lädle oder uff de Märkt zom kaufa. Natirlich schigged mir eich au Kundawünsche zu, die mr vorher leif oder an dr Strippe gschwätzt henn.

Wann senn Stöffle ond Hölzle em Lädle?

Do glotzed ihr oifach mol uff des Bild, uff dr erschda Seite (des wird ständig aktualisiert). Do stoht drenn wenn mr do senn, oder au ed. Ond wenner´s mol so dringend hann solled, dass ihr en andera Termin brauched, no schwätzed ons halt en gottsnama o. Mir beißed ja ed.

Dankschee an onsere Gäscht zur Eröffnung

Onser Lädle hot am 06. Oktober 2024 sei Eröffnung gfeiert. Mensch, wared do Leit do. Des wared so viel, die hätsch noch oba stabla kenna. Des war echt a schee´s Fescht. Uff dr erschda Seite von onserer Hompaitsch sehad ihr dr Film zo dem Iwent. Gmacht ond dreht hot ihn s´Dechderle vom Herr Hölzle. Ond dr musikalische Doil hot ons dr Smudo von de Fantastische Vier gmacht. Der war ons eh no was schuldig, weil er mol a Dasch saugünstig greagt hot. 

Henners läsa kenna?

Mir wissed, viele Leit uff derra Welt kennad koi Schwäbisch. Schreibet eich ed ab, ond lerned dui Sproch.

Mir senn "THE LÄND" (wie des onser schwäbische Regierung so schee end Welt nausposaunt). Wir können alles, außer Hochdeutsch ond Englisch.

Ond jetzt no ebbes en oigener Sache